我的媽媽

Publié par Mei Mei Shih le 1 mars 2021

2019年12 月我爸爸過身，幫佢辦喪事的時候，驚訝發現爸爸原來已經86 歲，而媽媽已經80 歲了！

喺爸爸過身的半年前，已經發覺媽媽嘅記憶力開始衰退,有時候教左佢嘅嘢，第二日已經唔記得咗。起初我會好不耐煩地多教佢一次。但後來我發現，佢唔單止冇記性，而且脾氣亦非常古怪，好似一個成日扭計嘅小朋友咁，做一啲好奇怪嘅嘢，吸引你嘅注意力，或者喺你忙緊嘅時候，不停咁喺你旁邊同你講嘢，希望你處理咗佢嘅問題先！

有時候，佢會喺幫我做完一啲嘢之後，不停自己讚自己，直到我認同佢，或者讚佢為止。其實呢啲舉動，同一個小朋友冇分別，唯一唔同嘅係，佢係我尊敬嘅媽媽!

爸爸過身之前嘅一兩年，媽媽已經開始每日到我公司陪我返工，好好彩嘅係,我做緊嘅係自己生意，唔會有老細話唔畀我帶媽媽返工。而爸爸亦好鼓勵媽媽到公司幫我手, 希望可以為佢搵倒一些寄託，即使有時媽媽唔想返工，或者因為同我嗌咗交，爸爸都會安慰佢，叫佢忍耐一下。其實我好明白爸爸既苦心，起初想媽媽睇實我呢個剛剛死左老公既女兒（2015年尾，丈夫過身）怕我會做傻事。另一方面，佢明白到自己時日無多，希望將媽媽交托比我，唔想佢孤零零咁過日子。

媽媽同仔女都係自己嘅親人，即使唔情願都要照顧同忍耐佢，唯一唔同嘅，係仔女有一日會長大,唔再需要你；但媽媽就會越嚟越變得需要你既照顧, 直到有一日離開你為止！

每一個人都會老，都會離開呢個世界，祝願所有人都能珍惜眼前人!

我的媽媽

這是本站的原創文章，轉載請註明版權，版權歸ME100FUN和作者共同所有。

不同的階段，有不同的體驗和感受。[外星人媽媽手記] 共分以下三篇:

<外星人媽媽手記-幼兒篇 >

<外星人媽媽手記-青少年篇>

<外星人媽媽手記-成人篇>

Partager ce message

0 commentaire

Laisser un commentaire